ماتحضنينا يامصر ..ولا انتي مكسوفة ؟؟

انا عمري دلوقتي حوالي 22 سنة بس للاسف ماحستش بحضن مصر ولا مرة في حياتي غير 18 يوم
يعني مصر حضنتني في ال22 سنة 18 يوم بس .....بس بصراحة كان حضن كله أمل وحنان ورحمة
بس للأسف الحضن مطولش ...ليه ؟؟
لأن فجأة ومصر حضناني حد قام جي وخطفها مني بعيد ومنعها ان تشوفني او حتي تسلم عليا سلام اخير
تخيلوا لما امي تبقي بعيدة عني 22 سنة غصب عنها طبعا وافضل في حضنها 18 يوم ويجي حد يخطفها مني
مستنين مثلا اني اعمل ايه اقوله والله انتا تمام وانتا اللي حمتني معتقدش الا اذا كان شخص عديم الاحساس
انا عارف يابلدي انك غصب عنك ..وانك ياما صرختي علشان نحررك وياما اتبهدلتي بسببي بس والله انا عملت اللي عليا
وكنت خلاص بس ولاد الحرام طلعوا وفرقوني عنك ورموكي تاني في السجون وبيعذبوكي ويبهدلوكي بس وعد مني بعادي عنك
مش حيطول ومش حسيبك تاني انا مصدقت لقيتك ..انا من غيرك كنت ضايع وانتي اللي رجعتيني للحياة
والله بدمي اسيبك يا امي او اخليكي تتبهدلي تاني او اسيب ولاد االكلب ينهشوا فيكي من غير رحمة
واللي داق حنان حضنك وداق طعم الكرامة مستحيل يفرط فيهم الا بموته وانا اخدت العهد علي نفسي اني اموت في حضنك
احسنلي ماعيش بعيد عنك واسيبهم يقطعوكي قدامي .
ارجوكي سامحيني واعرفي انه غصب عني زي مانا سامحتك طول ال22 سنة لاني عارف انه كان غصب عنك
مش حسيبك تاني مستحيييييييييييييييييييييييييييييييييل.

يعني ايه ثورة مصرية بالمفتشر ..........

ثورة مصرية ...في القاموس المصري
يعني بكل بساطة الناس تثور علي الظلم والفساد يحركهم شباب غلبان بيحلم بعيشة زي ما شباب العالم عايشين
فيقوم الحاكم الظالم اللي احنا ثورنا عليه يسلم السلطة تسليم اهالي للي كانوا بيحموه وبيحموا الظلم.
يعني ايه ثورة مصرية يعني لخبطة ومتعرفش مين معدي
يعني ايه ثورة مصرية يعني شوية شباب قرفين في نفسيهم وحرقين دمهم علشان الشعب والشعب يقول عليهم خربوا البلد
يعني ايه ثورة مصرية يعني طرشي في برميل .
يعني ايه ثورة مصرية يعني اللي قتل المصريين والارهابيين بيعملوا احزاب وليهم كلمة
يعني ايه ثورة مصرية يعني اخوان وسلفيين وجمعة الهوية
يعني ايه ثورة مصرية يعني حاجة كدا بزرميط
وابقي سلملي عالبتنجان

انجازات المجلس العسكري بعد حوالي 8 شهور

اتعجب من الناس اللي عمالة تهاجم المجلس العسكري وحكومة شرف

فحبيت اقولهم بعض الاندازات العظيمة بتاعتهم علشان يلموا الدور شوية

والانجازات هي كالاتي ::
1 _ حل مشكلة البطالة عند البلطجية يعني زمان البلطجية ماكنوش لاقيين شغل دلوقتي شغالين تمام أوي ومفيش مشاكل.
2_ اسرائيل بطلت تقتل عسكريين علي الحدود زي ماكان بيحصل ايام مبارك وبقت بتقتل 6 او 7 مع بعض .
3_ خلصونا الحمد لله من الحزب الوطني الفاسد .. وبقي فيه يجي 20 حزب وطني دلوقتي.
4_ حمو الثورة في عز البرد في الشتا وغطوها كويس اوي بالبطاطين لعند ماكتموا نفسها وموتوها.
5_ الناس شغالة دلوقتي بتعمل حد ادني للاجور 700 جنيه ...وضاعفوا الاسعار مقدما قبل ما يخلصوا من موضوع الاجور علشان جشع التجار.
فحرام عليكم يعني ارحموا البلد بقي خربتوها وضيعتوا مصر
كفاية كدا ولا اقولكم انجازات تاني...................؟؟